News Details

25/03/2022

وزیراعلیٰ خیبرپختونخوا محمود خان نے پولیس شہداءاور زخمیوں کو ملنے والے مالی معاوضوں کے طرز پر محکمہ جنگلات اور جنگلی حیات کے دوران ڈیوٹی شہید اور زخمی ہونے والے ملازمین کے لئے بھی خصوصی پیکج کی منظوری دیدی ہے

وزیراعلیٰ خیبرپختونخوا محمود خان نے پولیس شہداءاور زخمیوں کو ملنے والے مالی معاوضوں کے طرز پر محکمہ جنگلات اور جنگلی حیات کے دوران ڈیوٹی شہید اور زخمی ہونے والے ملازمین کے لئے بھی خصوصی پیکج کی منظوری دیدی ہے۔ وزیراعلیٰ نے اس سلسلے میں محکمہ جنگلات اور جنگلی حیات کی طرف سے ارسال کردہ سمری پر دستخط کئے ہیں۔ تفصیلات کے مطابق دوران ڈیوٹی شہادت کی صورت میں محکمہ جنگلات اور جنگلی حیات کے گریڈ3 تا 16 کے ملازمین کے لواحقین کو 33 لاکھ روپے، گریڈ 17 کے ملازمین کو 55 لاکھ روپے، گریڈ 18 اور 19 کے ملازمین کو 99 لاکھ روپے جبکہ گریڈ 20 کے ملازمین کے ورثاءکو ایک کروڑ دس لاکھ روپے معاوضے ادا کئے جائیں گے۔ اسی طرح دوران ڈیوٹی کسی حادثے کے نتیجے میں مستقل معذوری کی صورت میں تمام ملازمین کو یکساں طورپر پانچ لاکھ جبکہ شدید زخمی ہونے کی صورت میں تمام ملازمین کو یکساں طورپر ایک لاکھ روپے معاوضہ دیا جائے گا۔ علاوہ ازیں شہادت کی صورت میں گریڈ 3 تا 8 کے ملازمین کے لواحقین کو پلاٹ کی جگہ گیارہ لاکھ روپے نقد، گریڈ 9 تا 16 کے ملازمین کے لواحقین کو 22لاکھ روپے نقد جبکہ گریڈ 17 اور اس سے اوپر کے ملازمین کے لواحقین کو 55لاکھ روپے نقد بھی دئیے جائیں گے۔ واضح رہے اس سے قبل محکمہ جنگلات اور جنگلی حیات کے ملازمین کو دوران ڈیوٹی شہید ہونے کی صورت میں کوئی معاوضہ نہیں ملتا تھا۔