News Details

06/07/2025

وزیر اعلیٰ خیبر پختونخوا علی امین خان گنڈاپور نے ہفتے کے روز کوہاٹی گیٹ میں قائم سپریم کمانڈ پوسٹ کا دورہ کیا اور دسویں محرم کے لئے سکیورٹی انتظامات کا تفصیلی جائزہ لیا۔

وزیر اعلیٰ خیبر پختونخوا علی امین خان گنڈاپور نے ہفتے کے روز کوہاٹی گیٹ میں قائم سپریم کمانڈ پوسٹ کا دورہ کیا اور دسویں محرم کے لئے سکیورٹی انتظامات کا تفصیلی جائزہ لیا۔ متعلقہ حکام کی طرف سے محرم الحرام کی سکیورٹی کے علاوہ، مجالس اور جلوس والے مقامات پر صفائی ستھرائی، بجلی کی بلاتعطل فراہمی سمیت دیگر امور پر بریفنگ دیتے ہوئے بتایا کہ سپریم کمانڈ پوسٹ مرکزی کنٹرول روم ہے جو یکم محرم سے دن میں 24 گھنٹے کام کر رہا، سپریم کمانڈ پوسٹ کے قیام کا مقصد محرم الحرام کی سکیورٹی کے لئے متعلقہ اداروں کے درمیان موثر کوآرڈینیشن، مانیٹرنگ اور بروقت رسپانس کو یقینی بنانا ہے۔ مزید بتایا گیا کہ سپریم کمانڈ پوسٹ میں پولیس، ریسکیو، پاک فوج، انٹیلیجنس اداروں سمیت دیگر تمام متعلقہ محکموں اور اداروں کے کا عملہ ڈیوٹی پر تعینات ہیں، سپریم کمانڈ پوسٹ کے علاوہ صوبائی دارالحکومت پشاور میں پانچ سب کمانڈ پوسٹ بھی قائم کئے گئے ہیں۔ حکام نے بتایا کہ صوبائی دارالحکومت پشاور میں محرم الحرام کے کل 116 جلوس اور 316 مجالس منعقد ہونگے، جلوس اور مجالس کے مقامات پر فول پروف سکیورٹی انتظامات کئے گئے ہیں، محرم کے تمام جلوسوں کی سی سی ٹی وی کیمروں اور ڈرون کیمروں کے ذریعے لائیو مانیٹرنگ کی جارہی ہے جبکہ جلوس اور مجالس والے مقامات پر صفائی ستھرائی اور بجلی کی بلاتعطل فراہمی یقینی بنائی گئی ہے۔ اسی طرح جلوس کے آس پاس والے علاقوں میں خصوصی ٹریفک پلانز ترتیب دئے گئے ہیں، محرم الحرام کے دنوں میں دفعہ 144 کے تک ڈبل سواری پر پابندی عائد کی گئی ہے، صوبہ بھر کے ہسپتالوں میں ایمرجنسی نافذ کرکے عملے کی چھٹیاں منسوخ کی گئی ہیں۔اسی طرح ریسکیو اور ٹی ایم ایے عملے کی چھٹیاں بھی منسوخ کی گئی ہیں اور مسلکی ہم آہنگی کو برقرار رکھنے کے لئے تمام مکاتب فکر کے نمائندہ علماءبھی سپریم کمانڈ پوسٹ میں موجود ہیں۔ بریفنگ میں بتایا گیا کہ صوبائی دارالحکومت پشاور میں محرم کی سکیورٹی کے لئے 1180 سکیورٹی اہلکار تعینات کئے گئے ہیں جبکہ دیگر اضلاع میں بھی محرم الحرام کے لئے اسی طرح کے انتظامات کئے گئے ہیں، محرم الحرام کے لئے تمام متعلقہ محکموں اور اداروں کے درمیان کوآرڈینیشن کا موثر نظام قائم ہے اور کسی بھی ہنگامی صورتحال سے نمٹنے کے لئے کوئیک رسپانس کا مو ¿ثر میکنزم قائم ہے۔ وزیر اعلیٰ نے محرم الحرام اور خصوصی طور پر عاشورہ کے لئے سکیورٹی اور دیگر انتظامات پر اطمینان کا اظہار کرتے ہوئے متعلقہ حکام کو 10 محرم الحرام کے جلوسوں کی سکیورٹی پر خصوصی توجہ دینے کی ہدایت کی۔ وزیر اعلی نے سپریم کمانڈ پوسٹ سمیت دیگر کنٹرول رومز میں محرم الحرام کی ڈیوٹیاں سرانجام دینے والے تمام اداروں کے اہلکاروں کے لئے 10، 10 ہزار روپے اعزازیوں کا اعلان کیا۔ اس موقع پر میڈیا سے گفتگو کرتے ہوئے انہوں کہا کہ محرم الحرام کے جلوسوں اور مجالس کے لئے سکیورٹی کے فول پروف انتظامات کئے گئے ہیں،صوبہ بھر میں محرم الحرام کے 10 ہزار مجالس اور ایک ہزار جلوس منعقد ہونگے،۔ان جلوسوں اور مجالس کی سکیورٹی کے لئے 36 ہزار سکیورٹی اہلکار تعینات کئے گئے ہیں،کسی بھی ہنگامی صورتحال سے نمٹنے کے لئے ہسپتالوں، ریسکیو اور ٹی ایم ایز میں ایمرجنسی نافذ کی گئی ہے۔ وزیر اعلیٰ نے کہا کہ۔ان تمام مجالس اور جلوس کی موثر مانیٹرنگ کے لئے کنٹرول رومز قائم کئے گئے ہیں، امید ہے محرم کے تمام جلوس اور مجالس پر امن انداز میں اپنے اختتام کو پہنچیں گے۔ ایک سوال کے جواب میں وزیر اعلیٰ نے کہا کہ ہم سب پر لازم ہے کہ محرم الحرام عقیدت اور احترام کے ساتھ منائیں،۔کربلا کا واقعہ ہمیں صبر اور حق و سچ کے ساتھ کھڑے ہونے کا درس دیتا ہے، کربلا میں شہید ہونے والے عظیم ہستیوں کی قربانیوں کو خراج تحسین پیش کرنے کا یہ بہترین طریقہ ہے کہ ہم حق کے ساتھ کھڑے ہوں۔ انہوں نے عوام خصوصا علمائے کرام سے اپیل کی کہ وہ محرم الحرام کے دوراں بین المسلکی ہم آہنگی کو برقرار رکھنے میں اپنا کردار ادا کریں۔