News Details
21/09/2025
وزیر اعلی خیبر پختونخوا علی امین گنڈاپور نے ہفتے کی شام چارسدہ روڈ پر قائم محکمہ لائیو اسٹاک کے ماڈل میٹ پروسیسنگ پلانٹ اینڈ ٹریننگ سنٹر کا اچانک دورہ کیا۔
وزیر اعلی خیبر پختونخوا علی امین گنڈاپور نے ہفتے کی شام چارسدہ روڈ پر قائم محکمہ لائیو اسٹاک کے ماڈل میٹ پروسیسنگ پلانٹ اینڈ ٹریننگ سنٹر کا اچانک دورہ کیا۔ بین الاقوامی معیار کا یہ پراسیسنگ پلانٹ اور ٹریننگ سنٹر گزشتہ آٹھ مہینوں سے بند پڑا ہوا تھا۔ پروسیسنگ پلانٹ میں نصب کروڑوں روپے مالیت کے جدید ساماں اور آلات غیر مستعمل پڑے ہوئے تھے۔ وزیر اعلی کو بعض ذرائع سے پراسیسنگ پلانٹ عرصہ دراز سے غیر فعال ہونے کی شکایت موصول ہوئی تھیں۔وزیر اعلی نے عرصہ دراز سے پراسیسنگ پلانٹ غیر فعال رہنے کا سختی سے نوٹس لیتے ہوئے متعلقہ حکام کو 15 اکتوبر تک پراسیسنگ پلانٹ اور ٹریننگ سنٹر کو ہر لحاظ سے فعال بنانے کی ہدایت کرتے ہوئے تنبیہ کی کہ مقررہ وقت میں پلانٹ فعال نہ ہونے کی صورت میں تمام متعلقہ حکام کے خلاف سخت کاروائی عمل میں لائی جائے گی۔ انہوں نے مزید ہدایت کی کہ ٹریننگ سنٹر میں باقاعدہ ٹریننگ شروع کرنے کے لئے رجسٹریشن کا عمل فی الفور شروع کیا جائے اور ٹریننگ سنٹر میں قائم ماڈل میٹ شاپ کو بھی فعال بنایا جائے۔ انہوں نے یہ بھی ہدایت کی کہ ٹریننگ سنٹر میں بین الاقوامی معیار کی سرٹیفکیشن شروع کرنے کے لئے بھی ضروری اقدامات کئے جائیں، صوبے کے دیگر اضلاع میں بھی اسی طرز کے جدید میٹ پراسیسنگ پلانٹس لگانے پر کام کیا جائے اور اس مقصد کے لئے نجی سرمایہ کاری کو راغب کیا جائے جبکہ ایسے سروس ڈیلیوری یونٹس کو بہتر اور پائیدار بنیادوں پر چلانے کے لئے نجی شعبے کے ساتھ شراکت داری قائم کی جائے۔ علی امین گنڈاپور کا کہنا تھا کہ اس ماڈل پراسیسنگ پلانٹ کے قیام پر عوام کا پیسہ لگا ہے، جس کے ثمرات بلاتاخیر عوام تک پہنچنے چاہیئے۔ انہوں نےکہا کہ عوامی خدمات کے ایسے دیگر مراکز پر بھی اچانک چھاپے لگائے جائیں گے اور سروس ڈیلیوری غیر تسلی بخش ہونے پر متعلقہ ذمہ داروں کے خلاف سخت کارروائیاں عمل میں لائی جائیں گی۔